حيدر بابايه سلام

استاد شهريار

حيـــدربابا ، گـون داليـنـى داغلاسـيـن !
اوزون گولسون ، بولاق لارين آغلاسين !
اوشاق لارين بير دسته گول باغلاسين !

يــئـل گلــنده ، وئــــر گتــيــرسين بويانا
بـلکـــه مـنـيـم يـاتـمـيـش بـختيم اويانا

حـيــدربـابـا ،‌ سنـيــن اوزون آغ اولــســون !
دؤرت بير يانين بولاق اولسون باغ اولسون !
بيـزدن سونرا سنين باشين ساغ اولسون !

دونـيــا قــضو - قـدر  ،  اؤلـوم- ايـتـيـمـدى
دونـيــا بـويـى اوغولسوزدى ، يـئـتـيـمـدى

حــيـدربـابـا ، يــولـوم سـنـدن کــج اولـدى
عـؤمروم گـئچدى ، گلممه ديم،گئج اولدى
هئــچ بـيـلمه ديــم گؤزللـرين نئــج اولــدى
بــيـــلمزيـديـــم دؤنــگه لـر وار ،‌ دؤنـوم وار
ايـتـگين لـيـک وار ، آيريليــق وار ، اؤلوم وار

حيدربابا ، ايگيت اَمَک ايتيرمز
عؤموْر گئچر ، افسوس بَرَه بيتيرمز
نامرد اوْلان عؤمرى باشا يئتيرمز
بيزد ، واللاه ، اونوتماريق سيزلرى
گؤرنمسک حلال ائدوْن بيزلرى

حيدربابا ، ميراژدر سَسلننده
کَند ايچينه سسدن – کوْيدن دوْشنده
عاشيق رستم سازين ديللنديرنده
يادوندادى نه هؤلَسَک قاچارديم
قوشلار تکين قاناد آچيب اوچارديم

شنگيل آوا يوردى ، عاشيق آلماسى
گاهدان گئدوب ، اوْردا قوْناق قالماسى
داش آتماسى ، آلما ،‌ هيوا سالماسى
قاليب شيرين يوخى کيمين ياديمدا
اثر قويوب روحومدا ، هر زاديمدا

حيدربابا ، قورى گؤلوْن قازلارى
گديکلرين سازاخ چالان سازلارى
کَت کؤشنين پاييزلارى ، يازلارى
بير سينما پرده سى دير گؤزوْمده
تک اوْتوروب ، سئير ائده رم اؤزوْمده

حيدربابا ،‌ قره چمن جاداسى
چْووشلارين گَلَر سسى ، صداسى
کربليا گئدنلرين قاداسى
دوْشسون بو آج يوْلسوزلارين گؤزوْنه
تمدّونون اويدوخ يالان سؤزوْنه

حيدربابا ، شيطان بيزى آزديريب
محــبتــى اورکلردن قازديــريــب
قره گوْنوْن سرنوشتين يازديريب
ساليب خلقى بير-بيـرينيـن جانينا
بـاريشيغى بلشديريب قانــينا